Uulitin ko po: Mayroon nang at least 5 court decisions at 13 confessions ng mga cronies o kasabwat na may nakakalulang mga nakaw na yaman ang mga Marcoses. Ang hindi pagkakakulong ni Imelda ay hindi pruweba na ang pamilya Marcos ay inosente. Wala ni isang court decision na nagsabing abswelto sila sa lahat ng charge ng pagnanakaw. Ang artikulo pong ito ay upang sagutin ang tanong na bakit hindi pa nga nakakulong si Imelda.

Nahatulan si Imelda Marcos ng Sandiganbayan noong 2018 na GUILTY OF 7 COUNTS OF GRAFT na may parusang 6 years each, or total of 42 years. Agad-agad siyang nagpiyansa kaya hindi na naituloy ang pagkakakulong sa kaniya. Mananatili siyang malaya hangga’t hindi pa naaaksyunan ng Korte Suprema ang kaniyang appeal. Ito ay kalayaang mula sa mga karapatan niya sa ilalim ng demokrasya na pinasinayaan ni Pangulong Corazon Aquino.

Bakit naman hindi nakasuhan si Imelda for plunder gaya ng Pangulong Erap Estrada at Gloria Arroyo? Under the Plunder Law kasi, dapat hindi bailable ang pagnanakaw ng mag-asawang Marcos. Ngunit hindi po sila maaaring kasuhan under the Plunder Law dahil 1991 lang po naging effective ang Plunder Law o RA 7080, at bawal sa ating sistema ng batas na bigyan ng retroactive effect ang mga criminal laws.

Eh, bakit hindi pinakulong si Imelda sa ilalim ng mga desisyon na nagsabing may nakaw na yaman ang mga Marcos sa ilalim ng 1955 Anti-Ill Gotten Wealth Act (Republic Act 1379)? Wala po kasing penalty of imprisonment para sa mga public officials na nagkamkam ng yaman na “manifestly out of proportion” sa kanilang lehitimong yaman. Ang penalty lamang po para sa pagkamkam ng ill-gotten wealth ay pag-forfeit sa pamahalaan ng mga assets na nakitang sobra-sobra sa kanilang lehitimong yaman.