Ang propesyon ko po dati, gaya ng kwento ko sa inyo, ay sa libro at pagtuturo ng batas, sa ilang mga international na kaso, sa pagpapatakbo ng Policy Center sa Asian Institute of Management, at sa Korte Suprema. Nagpatakbo din ako ng isang IT company na organized legal research ang output. Bagamat babad ako sa day to day life ng Pilipino dahil nanay ako, at sa isang small church, hindi ako nakasalimuha ng dark side ng IT. Yun pala, masyadong laganap na ang mga videos na nagpapakalat ng false information.

Assumption ko po, ang DepEd, ang PCGG, ang National Historical Commission, at iba pa, ay nakakapagpadaloy ng katotohanan buhat sa fruits ng labor nila, sa taumbayan, sa madla. Somehow, dahil reported naman sa dyaryo ang mga desisyon ng Korte Suprema at Sandiganbayan ukol sa pagnanakaw at pagpatay ng mga Marcoses at ng galamay nila, inakala ko na aabot ang mga ganitong findings sa kamalayan ng Pilipino. Hindi po pala nangyari iyon. O kung mayroon mang ganoon dati, nalusaw ang maraming makatotohanang kamalayan. Sa halip, ang napakain sa isipan ng taumbayan ay fake news na nakukuha sa mga YouTube, Tiktok at Facebook videos, na complete opposite ng findings ng responsible and credible institutions.

Wala namang nagpapakilala ni sinuman ng mga gumawa sa mga pekeng video na iyon tungkol sa:

1. Apaw-apaw na yaman ng mga Marcoses dahil sa allegedly mga manang lupa, at limpak-limpak na ginto nila (sinabi na ng Korte Suprema na walang mga ganitong sources of wealth ever naipakita sa lahat ng mga kaso nito);

2. Na kung maluluklok ang mga Marcoses, at mapapatupad ang “last will and testament” ni Ferdinand Marcos Sr. ay kaya na nating bayaran ang lahat ng mga utang ng Pilipinas (wala nga pong ganung lehitimong yaman except USD 300,00 lang ang mga Marcoses as of 1986);

3. Na si Ninoy ang nagtatag ng Communist Party of the Philippines, New People’s Army, Moro National Liberation Front at nagbenta ng Sabah sa Malaysia (super-fake po ito kahit sa anong lehitimong source pa i-check);

4. Na ang mga family members o NPA o si Joma Sison ang nagpapatay kay Ninoy Aquino (sabi po ng Sandiganbayan at Korte Suprema ang pumatay kay Ninoy ay mga sundalong kumuha sa kanya mula sa eroplano).